Hebrews 11
Tava'u 'Ilixo sou Muxamuxaxu Tanenge
1 aTava'u tamuxamuxaxu tanenge ne aloxo 'o. Mii ma'ia ane nenge teloloopalanu sou tano'u ne, nenge tano'u. Mo tamaisou no ienge uasi ne, ia nenge tano'u manina. 2Ta mitema sou tatei mimuxaxu tane'i la Lataua mu'osasi'axu.3 bNenge temuxaxu tanenge la telavusou lexe loxotolo ilou lialia muxali no anu vaikala noxou Latauasi. Aloxo ne la sou mimii e nenge temaisou 'o ne, Lataua mukoinu no anu mimii e nenge tamomomosou tamaisou no ienge uasi.
4 cAveli mumuxaxu tanu noxou Lataua xe mu'elaxu mimii mulai noxou Lataua, la Anu mu'osasouxu. La mumasaxau mimii e anu mu'elaxu ne, ia u'osasou ane noxou Kaini uasi. Xo Aveli mumuxaxu tanu la sou Lataua mu'osasouxu no anu mimii e anu mu'elaxu mulai noxou ne. La mumoxo'u lexe anu itema mulapu. La sou Aveli musoli, ia vaimomo 'o no anu muxamuxaxu tanu noxou ne, a ua'alomenge sio.
5 dEnoko mumuxaxu tanu noxou Lataua, la Lataua muno'u mulailixu teitexi no opo loxotolo ia usoli uasi. Ta mitema ikakamulinu, la ixalisou uasi, xo Lataua muno'u. Lavuku Tavuna teinu muvikala lexe, tei no mine Lataua uno'u Enoko uao, la anu 'ilixonu ne lailaixe manina no iou Lataua. 6Ia itema e umuxaxu tanu noxou Lataua uasi la umomomo sou Lataua u'osasou uasi. Xo itema ane une'e 'alai noxou ne anu laixe lexe umuxaxu tanu lexe Lataua anu a uxolu. Mo umuxaxu tanu lexe Anu ulosi'a ane'i ane ikakamulinu ului'a.
7 eNoa kalumo mumuxaxu tanu noxou Lataua la sou Lataua muvikalanu lamana no anu mii ma'ia sou uxali ili'i e Noa umaisou no iou uao. La sou anu mulomuxu vaikala noxou Lataua la mu'oxonu lasipi vile. La anu ilee semau mo ta 'olu mi'unalai mixolu no nano no anu lasipi la mimauli ia isoisoli uasi. No anu muxamuxaxu tanu noxou Noa la anu mupala'alixu susu noxi'a ta mitema no lialia 'o mukalusi. Xo anu mumuxaxu tanu noxou Lataua la sou Lataua mu'osasou la mumoxo'u lexe anu vile noxi'a ane'i ane Lataua mumoxo'a lexe ane'i milapu.
8 fMo Avalaamu kalumo mumuxaxu tanu noxou Lataua, la sou no mine Lataua mu'avalou sou ulai no xalee lia vile e Lataua mulosou lexe anu na'u muisalili, la anu mulomuxu vaikala noxou Latauasi. Ia anu ulavusou lexe no 'a xalee anevaa uasi, la anu mumuxaxu tanusi la mulai. 9 gAnu mumuxaxu tanu la mulai muxolu no anu lia xalenu e Lataua muvikalanuxu tei lexe ulosou. La mutulusou tani alelaxu sou muxolu no anu loxo aasila molu no tuala vile mune'e muxolu. Mo Aisaki ilou Iakovo kalumo ane'i ilo'a mixolu no anu tani alelaxu ne sou mixomaiou tuala tatila. 10Xo anu tanu u'oxoxu tuala tatila e Lataua molu muxavutalanu sou utulusou a loxovaa, xe mukalu la Anu molu mutulusou. Tuala tatila ne anu tava'u pumuxu manina.
11 hXo Avalaamu mumuxaxu tanu noxou Lataua la semau Sala kalumo mimuxaxu tane lexe ane sema tila mo ilavusou ipalaa uasi, xo ane miua'ulixu tauu ie sou ipalaa. Ane mimuxaxu tane noxou Latauasi lexe Anu umomomo sou u'oxonu mii ma'ia musakiinu vaikalasou lexe u'oxonu ne uxali maninasou. La sou mu'oxone la sou ane imomomosou ipalaa, la mivo'onu 'ilie. 12 iMo noxou itema vilesisi nesi Avalaamu anu itema tila mo vasimolu musoisoli mo xaviinu sou upalaa la uasi. Ia anu mumomomo sou muxalixa'a ta xaixasou ilo'a ta 'ilusu'ilusunu mixali tavu'alo manina loxo ta oto teitexi no loxotolo xe io'iio'i no tasi'i e taitisou la takalasou uasi.
13 jAne'i ta mitema ane ne mimuxaxu tane'i noxou Lataua mulai no anu soli noxi'a. No mine mixoxolu no lia 'o la ino'u mimii e Lataua musakiinu vaikalasou lexe ulosi'a ne uasi. Ane'i mitulu la mimaisou mimii ne muxolu la'ala'a manina noxi'a la misexelaxusi. La mivikala lamana lexe ane'i ta asilasi mo ixolu maxuveeni uasi. 14Ta mitema ane ivikala loxo ne, la anu mumaxa'u lexe ane'i ikakamulinu tualasi'a maninasou a uao. 15Mo lexe ane'i ixavutala no anu tualasi'a e ane'i mi'umesou ia mine'e ane'i imomomo sou ilivu. 16Ia uasi, ane'i xavutalai'a ututulu no anu tuala e lailaixe manina. Tuala ne a teitexi no opo loxotolo. Aloxo ne la sou Lataua umomomo sou umaela uasi no mine imoxo'u lexe Anu Lataua noxi'a. Xo Anu mulalaxiinu tuala vile tatila si'a sou ilai ixolu no anu.
17 kLataua muvikalanu Avalaamu aloxo 'o, “Noxou 'iline Aisakisi la ta xaixaisine ilo'a ta 'ilu'iulusuneni ixali tavu'alo.” Ia no mine Lataua mutovonu Avalaamu lexe uvau 'olu vilesisi ne mo u'elaxu ulai noxou, la anu mu'oxonusi xo anu mumuxaxu tanu noxou Lataua. 19 lXo Avalaamu muxavutala aloxo 'o, lexe Aisaki usoli la Lataua umomomo sou utulusou la. La sou anu loxo Avalaamu mulivunoxu 'olu no anu soli.
20 mMo Aisaki mumuxaxu tanu noxou Lataua la mualusi'a Iakovo ilou Esau sou xoluxoluxa'a ili'i. 21 nMo Iakovo mumuxaxu tanu noxou Lataua, la sou 'ala'alai sou usoli la anu mualusi'a Iosepu ta 'olu. Anu muteteli telixu no anu vilaxoxu sou mulotu mulai noxou Lataua.
22 oIosepu mumuxaxu tanu noxou Lataua kalumo, la sou no mine 'ala'alai sou usoli, la anu muvikalane'i lexe ili'i la ane'i i'umesie Aixiputo. Mo mupela'axu vasimolu sou i'oxonu a loxovaa.
23 pMo Mosesi nenu ilou momu mimuxaxu tane'i noxou Lataua la no mine nenu mivo'onu mukalu la mutalumeiou so'io tatalu. Xo ane'i mimaisou keakea ne loxo ta keakea mose'i uasi mo anu iou lailaixe. Mo ane'i ilou i'ume sou imamulonu lapuloto noxou tatananu tuala ne uasi.
24Mo Mosesi mumuxaxu tanu noxou Lataua, la sou no mine anu muxali tila, la anu umasaxa lexe ane'i ilemolu lexe anu Palao 'olu 'ilie uasi. 25Mo anu muxavutala lexe laixe sou uno'u tu'utu'umaxu iouvilesisi aloxo ta mitema noxou Lataua inono'u ne. Anu umasaxa umulinu 'ili'ilixo sou susu mo uxamulinu 'osa'ila ane ataxu ne uasi. 26Anu muxavutala lexe no mine ipamaelanu xo anu noxou Kalisito, la anu mii tatila mo muuliuli manina. Mua'ulixu lavuluti iouiou ne Aixiputo. Xo anu xavutalau utulu no anu mii ma'ia lailaixe e sou anu uno'u loxo 'ulu noxou ili'i. 27Anu mumuxaxu tanu noxou Lataua la sou anu Mosesi mu'ume mulaa ne Aixiputo. Mo tatananu tuala la'iaxuu ia anu u'umolu uasi. Mo anu mutulu pekia'u xo anu mumaisou Lataua e ta mitema imamaisou uasi no iou. 28 qMo anu mumuxaxu tanu noxou Lataua la muvikalane'i ta Isilaeli sou imulinu la'ilali sou Lataua mupolopepene'i ta Isilaeli laixe la mi'ou no anu voxo e Lataua iou muvaxai'a la mixolu laixe. Mo muvikalane'i la milutu sialu no aiaitengasi'a mo sou angelo sou uve'a ta 'ili'a ta laposalaxa'a une'e xe umaisou la upolopepeene'i.
29 rTa Isilaeli mimuxaxu tane'i noxou Lataua la mixisa'isou luaki laolaoinu ne aloxo mimuamua'i no lia esisi. Ia ta Aixiputo itovo sou lexe imuline'i la mi'uo'uo la misoisoli.
30 sMo ta mitema mimuxaxu tane'i noxou Lataua. La vimelu sou tuala tila ne Ieriko mumamumamulo no mine ta mitema mimuamua'i mixixao alaxu muxatele ta tamei.
31 tMo sema sou vote'i Le'evu mimuxaxu tane noxou Lataua kalumo, la misu'uline'i ta mitema ta tamei e mitalume mine'e mimaisou tuala tila ne tanu. La ta mitema e ilavusou imuxaxu tane'i noxou Lataua uasi iulua ia ane iulua uasi.
32 uXe eni maasi la amomomo sou a'aloxa'a Xitioni mo Valaka mo Samusoni mo Ieputa mo Deviti mo Samueli xe ta palomatana uasi. Xo taiinu sou a'aloxa'a uasi. 33 vAne'i ta mitema ne mimuxaxu tane'i noxou Lataua la mitaloxolixa'a ta tatananu 'oto'oto la mia'ulixa'a. Ane'i mi'oxonu 'ilixo mulapu la sou mino'u mii ma'ia e Lataua musakiinu vaikalasou tei lexe ulosi'a ne. Xe mitomunoxu ta laeoni anaxa'a. 34 wMo misitanoxu navu toxotoxoxa'a, mo mi'ume la laviso umomomo sou uto'ome'a isoli uasi. Mo pelepelesi'asi ia ane'i mixali xavine'i. Ia ili'i la ane'i xavine'i manina no anu 'oto'oto, la milelemuline'i ta mitema sou 'oto'oto no tuala va'ava'axu.
35 xXe mose'i misoisoli, ia mitulu mimauli la, la milivu mulai noxi'a ta neni'a la. Xe mose'i ne ta uluai'a mitatuxa'a no taasou navunavu mo mi'oxoo masuanu vasime'a manina mo 'ala'ala'i sou isoli. Sou itovone'i lexe ixiunu tumali'a noxou Lataua, ia uasi, xo ane'i tane'i mutuluu voxo lailaixe sou Lataua utulusi'a no anu soli la imauli la. Ane'i milavusou lexe ane'i isoli la Lataua utulusi'a la sou ino'u mauli lailaixe manina. 36 yMose'i noxi'a la misukune'i mo mimolovila'isi'a mo mipuapuasi'a xe misakisakine'i la mimulaxa'a no taasou navunavu. 37 zMo mive'ave'a no anu kulu mo mixotosou vasime'a no anu lasoo la mautunu ta tamei. Mose'i la mive'ave'a misoisoli no anu laviso e i'oto'oto no anu. Mose'i noxi'a i'a lavalava uasi, misakiinu sipsip ilou xoutu laxusousi la mixixaoxao, mo pa'usi'a no anu mimii tavu'alo sou vasime'a manina mo milosi'a tu'utu'umaxu xe mi'oxo masuane'i manina. 38La sou mi'ume milai va'ava'axu sou mitalume. Se'i mi'ume milai mixolu no xalee lia 'esi'esi mose'i no laxalaxa'ilu mose'i no kulu taxataxanu xe se'i milai mixolu no lia taxataxanu. 'Ilixo noxi'a ne iouvilemo manina, mua'ulixu 'ilixo noxi'a ta mitema no lialia 'o mukalusi e ane'i mixolu no taine'i ne.
39Ane'i ta mitema mukalusi ne Lataua mu'itinu ualasi'a xo ane'i mimuxaxu tane'i noxou. Ia vile noxi'a ne uno'u mii ma'ia e Lataua musakiinu vaikalasou lexe ulosi'a ne uasi. 40Xo tei manina la Lataua mulalaxiinu mii vile lailaixe manina sou nenge latala tano'u. Ia Anu uxalixu noxi'a ane'i ane mixali tei palea uasi, xo Anu mumasaxa lexe nenge kalumo taxali laixe manina loxo ane'i.
Copyright information for
ATA